រតនគិរីៈ កាលពីម្សិលមិញមនុស្ស៣នាក់ឪពុកម្តាយ និងកូនស្រីបានស្លាប់នឹងរងរបួសធ្ងន់ធ្ងរដោយសារតែជួបគ្រោះថ្នាក់ចរាចរណ៍ខណៈពួកគាត់ទាំងបីកំពុងជិះម៉ូតូក៏ត្រូវរថយន្តបុកចំពីមុខពេញទំហឹងតែម្តងស្ថិតនៅលើផ្លូវជាតិ៧៨ ចន្លោះបង្គោលគីឡូម៉ែត្រលេខ 547-548 ភូមិល្អីន ឃុំតឹន ស្រុកកូនមុំ ខេត្តរតនគិរី។ជនរងគ្រោះទាំងបីនាក់ជាឪពុកម្តាយនិងកូនស្រីបានជិះម៉ូតូមួយគ្រឿង ម៉ាកហុងដា ស៊េរីឆ្នាំ២០១៨ ពណ៌ខ្មៅ លុះមកដល់ចំណុចកើតហេតុក៏ត្រូវរថយន្តមិនចាំម៉ាកបើកបរក្នុងទិសដៅបញ្ច្រាសទិសគ្នាបោលមកបុកពេញទំហឹងបណ្តាលឲ្យបុរសជាប្តី ឈ្មោះជួន សម្បត្តិ ភេទប្រុស អាយុ៥៤ឆ្នាំ ជនជាតិខ្មែរ ស្លាប់នៅនឹងកន្លែងតែម្តង ចំណែកប្រពន្ធឈ្មោះ មុំ អាយុ៤១ឆ្នាំ រងរបួសស្រាល នឹងកូនស្រីឈ្មោះ លីហ្សា រងរបួសធ្ងន់បាក់ជើងស្តាំ។ អ្នកទាំងបីរស់នៅភូមិ៤ សង្កាត់កាចាញ ក្រុងបានលុង ខេត្តរតនគិរី។ក្រោយកើតហេតុ សមត្ថកិច្ចបានប្រគល់សព ជូនក្រុមគ្រួសារយកទៅធ្វើបុណ្យតាមប្រពៃណី។ចំណែករថយន្ត ក្រោយកើតហេតុអ្នកបើកបរបានបើកគេចខ្លួនបាត់ស្រមោល៕
